Stellingwarver aovend Wolvege Bluuit
De Stellingwarver Schrieversronte vragt al meer as vuuftig jaor andacht veur de Stellingwarver tael en Kultuur deur middel van kursussen, et tiedschrift De Ovend, boeken, cd’s en meer van zoks. Et laeste jaor perbeert de Schrieversronte de zichtberhied van et Stellingwarfs in de openbaore ruumte te vergroten.
Tiedens Wolvega Bloeit zal de Schrieversronte in de kerk een kotte lezing over et Stellingwarfs in de openbaore ruumte geven en laoten verschillende schrievers prachtige gedichten, grappige verhaelen en mooie lieties in et Stellingwarfs heuren. Et wodt vanzels een mooie aovend.
Johan Veenstra, al vuuftig jaor Stellingwarver schriever, het al meer as drieduzend keer optreden, het dartig boeken schreven, is ereburger van Weststellingwerf en in et bezit van een Zulveren Anjer. Hi’j mag op disse aovend vanzels niet ontbreken. Johan zal een peer grappige verhaelen veurlezen.
Karst Berkenbosch en Mark Verbeek laoten prachtige Stellingwarver lieties heuren van de ni’je cd Onderwegens.
Kulturele duzendpoot en oerstellingwarver Karst Berkenbosch von al een posien dat et wel weer es tied veur wodde veur een ni’je cd. Tegere mit gitarist Mark Verbeek is hi’j an de gang gaon mit ni’je Stellingwarver lieties mit as fantastisch risseltaot de cd Onderwegens.
De dichters Harmen Houtman en Roely Bakker schrieven ok al jaoren in et Stellingwarfs. Harmen het twie jaor leden de J.H. Bergveldpries wonnen, de belangriekste pries veur een schriever in et Stellingwarfs.
Disse maond is de dichtbundel Tegere uutkommen die Harmen en Roely saemen schreven hebben.
Beide dichters treden op mit gedichten uut de bundel.
Opgeven verplicht: wolvegabloeit@gmail.com
Deelname aan deze activiteit is op eigen risico.